Hagayya 22/2017 (TOI)- Gaaffiiwwan haqaa ummanni gaafatu qabatamaan furuu fi olaantummaa seeraa kabachiisuuf hojii hojjetameen jijjiiramoonni Jajjabeessoon Argamuu de’eetaan ministira haqaa Dr. Ermiyaas Yemaanebiraan dubbatan. Yaa’iin waloo ministeera haqaa fi biirolee haqaa naannolee 8ffaan mata duree “sirna haqaa amanamaa olaantummaa seeraa fi kabaja namoonaa mirkaneesse ni’ijaarra jedhuun” jedhuun har’a Dirree Dawaatti eegalameera. Yaa’ii guyyoota lamaaf turu kanarratti guduunfaan raawwiin hojii biyyaalessaa bara bajataa 2017 damee kanaa fi karoorri bara 2018 niqoratama.

Hagayya 22/2017(TOI)- Gamtaan Afriikaa dubartoonni nageenya a fi tasgabbii ardii Afriikaarratti qooda qaban caalaatti guddisuuf xiyyeeffannoon akka hojjetu dura taa’aan komishinii gamtaa Afriika Mahaammud Alii Yuusuuf ibsn. Dura taa’aan komishinii gamtaa Afriika Mahaammud Alii Yuusuuf jila addaa dubartootaa, nagaa fi tasgabbii gamtichaa haraa muudaman ambaasaaddar Layibeerataa Mulamulaa waliin marii tarsiimawaa jalqabaa Finfinneetti gaggeessaniiru. Carraaqqii gamtaa Afriikaatti walitti bu’iinsa furuuf taasifamu keessatti gaggeessummaa fi eegumsi dubartootaa wiirtuu xiyyeeffannaa ta’uu akka qabu durataa’aan kun dubbataniiru. Keesumaa dubartoonni bakkeewwan walitti bu’iinsii fi yaddoon jiranitti dhimmichi xiyyeeffannoon addaa akka barbaachisu ibsaniiru. Ittigaafatamni hojii ambaasaaddar Layibeerataa galmoota yeroo dheeraa kan akka ajandaa 2036 fi caasaa nagaa fi tasgabbii gamtaa Afriikaa (APSA) waliin walitti hidhamuun gamatti marii fi adeemsa nageenyaa gamtichi hoogganu irratti jaarsummaa dubartootaa fi hubannaa sirna saalaa waliin walitti hidhuuf galma kan qabu ta’uu dubbataniiru. Waliin dubbachuun gamatti dubartootaaf eegumsa gochuu qofa osoo hintaane dhimma nagaa fi tasgabbii Afriikaarratti murtee akka kennan gochuu barbaachisa jedhaniiru. Hawaasonni dinagdee riijinii, dhaabbileen idil addunyaa fi waldalee siviikii mandhalee dhimma dubartootaarratti tumsa cimaa uumuu fi sirna ittigaafatama ardii Afriikaa caalaatti mirkaneessuun akka barbaachisu dubbataniiru. Innisheetifoota Dubartootaan gaggeeffaman dhiheessiin faayinaansii fulla’aa jiraachuu qaba kan jedhan dura taa’ichi, gama Kanaan Gamtaan Afriikaa Pirojektiiwwan adda addaaf deeggarsa guutuu akka kennu mirkaneesseera. Gamtaan Afriikaa Dubartoonni Ijaarsa biyyaa keessatti qooda qaban guddisuuf cimsee akka hojjetu dubbataniiru. Ergamtuun Addaa dhimma Dubartootaa, Nagaa fi tasgabbii Gamtaa Afriikaa, Ambaasaaddar Laayibeerta Mulamulaa bara Aangoosaanii Waggaa Jalqabaatti kabajamuu Mirga dubartootaaf cimanii falmuu, haggansa siyaasaa dubartootaa guddisuu fi bu’aa qabatamaa koorniyaa irratti hundaa’e fiduu irratti xiyyeeffannaan akka hojjetan ibsaniiru. Mariin kun Gamtaan Afriikaa Waadaalee Ardii fi biyyoota Miseensaa gara bu’aa qabatamaatti jijiiruun dubartoonnii fi shamarran qooda adeemsa nagaa fi tasgabbii Ardichaa keessatti qaban guddisuun jijjiirama fiduuf kutannoo cimaa qabu akka agarsiisu odeeffannoon TOI'n gamtaa Afriikaarraa argate nimul'isa.

Hagayya 21/2017(TOI)- Hojiin Miidiyaa fi Komunikeeshinii Seenessa Waloo Ijaaruun, Eenyummaa Waloo fi Hiree Waloo agarsiisuudhaan Afriikaa Badhaatae Milkeessuuf qooda murteessaa qabu jedhan Ministirri Tajaajila Komunikeeshinii Mootummaa Dr.Laggasaa Tullu. Yaa’iin Waldaa Komunikeeshinii Afriikaa Bahaa 15ffaa Mata duree “Miidiyaa fi Komunikeeshiniin walitti makamuu Afriikaaf” jedhuun gaggeeffamamaa jira. Yaa’icha irratti argamuun Haasaa kan taassisan Ministirri Tajaajila Komunikeeshinii Mootummaa Dr.Laggasaa Tulluu akka jedhanitti, Afriikaan Ajandaa Gamataa Afriikaa 2063 qaxanaa Daldala walabaa Ardii Afriikaa fi karoora Ardii adda addaan gara walitti makamuu cimaa Diinagdee, Siyaasaa fi Aadaatti Ce’aa jirti jedhaniiru. Walitti makamuu Riijinii fi Ardii dhugomsuuf walitti hidhaminisi bu’uuraalee Misoomaa, Tumsa Riijinii Jabeessuunii fi Biyyoota Afriikaa jidduutti wal-jijiirraa Aadaa cimaa taassisuun barbaachisaadha jedhaniiru. Hojiin Miidiyaa fi Komunikeeshiniin Seenessa waloo Ijaaruun, Eenyummaa Waloo fi Hiree argisiisuun Afriikaa Badhaate Milkeessuuf qooda murteessaa akka qaban Ibsaniiru. Miidiyaa fi koomunikeeshiniin tamsaasa odeeffannoo qofa osoo hin ta’iin dhaabbata waliigaltee fi hunda galeessaa fi hawaasa nagaa qabeessa bocuuf bu’uura ta’uusaanii dubbataniiru. Waldichi rakkoolee Industirii Miidiyaa fi Komunikeeshinii furuuf yaada furmaataa dhiheessuun caalaatti qooda cimaa taphachuu qaba jedhaniiru. Hayyoonni Damichaa walitti makamuu Afriikaa cimsuu fi Afriikaa Badhaate dhugoomsuuf rakkoolee gufuu ta’uu danda’an hanbisuuf daandii ida’amuu argisiisuun tattaaffii isaanii cimsuu akka qaban hubachiisaniiru.

Hagayya 20/2017 (TOI)- Hojiileen sirna Buusaa Gonofaa caalaatti cimsanii fi miira abbummaa hawaasaa guddisan hojjetamaa jiraachuu hoogganaan Buusaa Gonofaa Naannoo Oromiyaa obbo Mahaammad Jundii dubbatan. Hooggantoonni Buusaa Gonofaa Oromiyaa waltajjii komunikeeshiniin naannichaa mata duree ‘Gumii Balballoomii’ jedhuun qopheesserratti hojiilee sirnichi bu’ura ummataa akka qabaatu hojjetamaa jiranirratti ibsa kennaniiru. Hoogganaan buusaa gobofaa naannichaa obbo mahaammad Jundii akka jedhanitti, sirna Gadaarraa kan maddee fi sirna walgargaarsaa kan ta’e Sirni Buusaa Gonofaa akka cimu taasifamaa jira. Keessumaa ummanni qaama biraarraa gargaarsaa fi deeggarsa eeguu jalaa bahee rakkoolee mudatan dandeettii ofiin damdamatee darbuu akka dandahu taasifamaa jira jedhaniiru. ABuusaa Gonofaa Oromiyaan amma ammaatti miseensa miiliyoona 27 horachuusaa eeranii, buusii isaanirraa argamuu fi kennaa kennamuufiin cimaa dhuufuu dubbataniiru. Haala Kanaan balaawwan uumamaa fi namtolchee naannichatti mudatanii ture dandeettii ofiin damdamachuusaa ibsaniiru. Bara bajataa 2017 naannicharra darbee naannolee biroofillee deeggarsa gochuusaa himaniiru. Itti aanaan hoogganaa Buusaa Gonofaa Oromiyaa obbo Tafarii Bayyanaa gamasaaniin, Buusaa Gonofaa Oromiyaan wayita rakkooleen mudatan qofa osoo hintaane hojiilee raagaa balaan duraa xiyyeeffatee hojjechaa akka jiru dubbataniiru. Kaayyoon ijoo Buusaa Gonofaa Oromiyaa hawaasni yaadama dandeettii isaatiin rakkoolee jala darbuu fi damdamachuu jiddugala godhatee hojjechaa jiraachuu ibsaniiru. Buusaa Gonofaan hojii deeggarsaa fi gargaarsaa idilee cinaatti soorata barattootaa naannichatti raawwatamu karaa Buusaa Gonofaa akka deeggaramu eeranii, manneen barnootaa baadiyyaatti argaman lafa qabanirratti qonna qotuun akka ofgargaaran taasifamaa akka jiru dubbataniiru.