Ebla 16/2017(TOI)- Sirni kaffaltii tuttuqaa namaa alaa (EATS) sirna faayinaansii cimaa fi amanamaa Itiyoophiyaatti ijaaruuf qooda ijoo akka bahu Baankii Biyyaalessaa Itiyoophiyaa beeksise. Baankiin biyyaalessaa sirna kaffaltii fooyya’insi taasifameef har’a ifoomseera. Sirni kaffaltichaa dhaabbileen faayinaansii odeeffannoo kan itti walii qoodan madaaltuu idil addunyaa”ISO 20022” kan guuttate ta’uu hubachiiseera. Sirnichi bu’ura misoomaa kaffaltii Itiyoophiyaa ammayyeessuun, si’aayinaa fi nageenya guddisuun akkasumas maallaqni baankiiwwan jidduutti haala olaanaan akka deddeebi’u akka taasisu ibsameera. Dhaabbileen faayinaansii 35 sirna kaffaltichaatti fayyadamaa akka jiran baankichi ibsee, kunis sirna Faayinaansii cimaa fi amanamaa ijaaruuf akka dandeessisu mul’iseera. Sirni kaffaltii tuttuqaa namaarraa walabaa (EATS) duraanii A.L.A bara 2011 irraa eegalee faayidaarra oolaa tureera.

Ebla 16/2017(TOI)- Ambaasaaddaroonnii fi dippilomaatonni teessoonsaanii Finfinnee ta’e paarkii biyyaalesaa gaarren Baalee Daawwwachuuf magaalaa Roobee dhaqaniiru. Itiyoophiyaan dur durii biyya hawattoota namtolchee fi uumamaa qabdudha. Ambaasaaddaroonnii teessoonsaanii Finfinnee ta’e hawattoota Itiyoophiyaa addunyaaf akka beeksisan gochuuf sagantaaleen garagaraa qophaa’uun ibsameera. Haala Kanaan jilli ambaasaaddarootaa fi dippilomaatota miseensota 20 qabu paarkii biyyaalessaa gaarreen Baalee daawwachuuf har’a magaalaa Roobee dhaqeeras. Jila kanaaf simannaan taasifameera. Hambaalee Itiyoophiyaan Yuuneeskootti galmeessifte keessaa tokko paarkii biyyaalessaa gaarreen Baaleeti. Paarkiin biyyaalesaa gaarreen Baalee bara 2062 hundeeffame.

Ebla 16/2017(TOI)-Jilli Ministira Maallaqaa Ahimad Shideen durfamu eeggataa itti aanaa piresidaantii bahaa fi kibba Afriikaa Amiit Daar waliin walgahii dhaabbata maallaqaa idil addunyaa fi baankii addunyaa irratti mari’ataniiru. Marichis riifoormii Dinagdee gooroo Itiyoophiyaa fi tumsa kallattii fulduraa irratti kan xiyyeeffate ta’uu ibsaniiru. Ministirichi mariisaaniin Itiyoophiyaatti gufuuwwan idil addunyaa hojiilee harka qalleeyyii irratti xiyyeeffatan irratti rakkoowwan mudachaa jiranii fi milkaa’inoota argaman ilaalchisee ibsa kennaniiru. Guddina tarsiimawaalammiilee hundumaaf badhaadhina mirkaneessuuf, ittifufiinsa maakiroo Faayinaansiin, Invastimantii kallattii Alaa, nageenya Annisaa, Daldala riijinii fi humna namaa irratti xiyyeeffate qooddataniiru. Itti aanaan ierezedantii Amiit Daar Itiyoophiyaan Dinagdee ishee Ammayyeessuuf , qaala’insa gabaa to’achuuf, invastimantii dhuunfaa babal’isuu fi gama dinagdeen hojiiwwan fooyya’insaa hojjetaman, tarkaanfiiwwan tarsiimoo fudhataman dinqisiifataniiru. Itiyoophiyaan guddina hunda galeessa fi adeemsa misooma itti fufsiisaaf gootu fi invastimentiiwwan lammiiwwanshee fayyadamoo taassisan, tarsiimoowwan fooyya’an, deeggarsa qaamolee dhuunfaaf baankichi deeggaruuf kutannoo qabu mirkaneesseera.

Ebla 16/2017 (TOI)- Riijiniin daldala Walabaa Ardii Afrikaa walitti hidhamiinsa qilleensaa cimaan yoo deeggaramu ni dagaaga jedhan Ministirri Geejjibaa fi Loojistikii Dr. Alemu Sime. Fooramiin Aviyeeshinii Ityoophiyaa jalqabaa Finfinnee Hoteela Iskaayilaayititti gaggeeffamaa jira. Ministirri Geejjibaa fi loojistikii Dr Alemuu Simee, Ministirri Turizimii Salaamaawit Kaasaa, Daarektarri Olaanaa Abbaa Taayitaa Siviil Aviyeeshinii Ityoophiyaa Geetachoo Mangiste, hoji gaggeessaa olaanaa Daandii Qilleensaa Ityoophiyaa Masfin Xaasoo fi qooda fudhattoonni biroo foramicharratti argamaniiru. Ministirri Geejjibaa fi Loojistikii Dr. Alamuu Simee, wayita kana akka jedhanitti; Itiyoophiyaan Aviyeeshinii Afriikaa amansiisaa,, fulla’aa fi walitti hidhamiinsa qabu uumuuf hojjechaa jirti. Daandiin Qilleensaa Itiyoophiyaa Afrikaa keessatti toora bakkeewwan geejjibaa guddaa fi adda addaa kan qabu ta’uu eeranii, kunis ardiilee walitti fiduuf kutannoo qabu kan agarsiisudha. Riijinii Daldala Walabaa Ardii Afriikaa mijeessuuf walitti hidhamiinsa qilleensaa cimsuun murteessaa ta’uus hubachiisaniiru. Daandiin Qilleensaa Itiyoophiyaa gara Loome, Liilongiwee fi Kisanganiitti babal’achuu ibsaii, kanaanis Paan Afriikaan kutannoo agarsiisuu isaa ibsaniiru. Ministirri Turizimii Salaamaawiit Kaasaa akka jedhanitti, turizimiin dameewwan mootummaan jijjiirama waggoota darban keessatti xiyyeeffannoo itti kenne keessaa isa tokko ta’uu ibsaniiru. Damee turizimii guddisuuf dameen Aviyeeshinii murteessaa ta’uu ibsuun, walitti hidhamiinsa Afriikaa keessatti cimsuun barbaachisaa ta’uu ibsaniiru. Hojii gaggeessaan olaanaa Daandii Qilleensaa Itiyoophiyaa obbo Masfin Xaasoo gamasaaniin waltajjiin kun dhimmoota induustirii aviyeeshinii, tajaajila geejjibaa qilleensaa fi kanneen kana fakkaatan misoomsuuf Itiyoophiyaa fi Afriikaa keessatti mari’atamuu danda’an irratti ni mari’ata jedhaniiru.

Ebla16/2017(TO)-Fandiin misoomaa Saa’udii deeggarsa Itiyoophiyaaf taasisu akka ittifufu beeksiseera. Walgahii baankii addunyaa fi dhaabbata maallaqaa addunyaarraa Ameerikaa Waashiingitanitti taa’amaa jirurratti hiraachaa kan jiran Ministirri maallaqaa Ahimad Shidee hojii raawwachiisaa olaanaa fandii misoomaa Saa’udii Sulxaan Abduraahimaan Almarshaad waliin mari’ataniiru. Mariin kunis, dhimmoota ijoo riifoormii dinagdee gooroo fi hirmaannaa fandiin misooma Saa’udii Itiyoophiyaa keessatti qabaachuu danda’u irratti kan xiyyeeffatedha. Ministirri maallaqaa Ahimad Shidee, Hojiirra oolmaa riifoormii dinagdee Gooroo fi bu’aa fide hubachiisanii riifoormichi hirmaannaa damee dhuunfaa kan guddisee fi damee anniisaa fi geejjibaa dabalatee bu’ura misoomaa mootummaan hojjeturratti jijjiirama dhufe kaasaniiru. Jijjiirama gama turizimii, Albuudaa fi qonnaa dhufes ibsaniiru. Hojii raawwachiisaan fandii misoomaa Saa’udii Sulxaan Abdulraahimaan Almarshaad gamasaaniin, tarkaanfiin riifoormii dirree mijataa Itiyoophiyaan invastimantii kallattii alaa irratti fudhattee fi bu’aa dhufe dinqisiifataniiru. Fandiin misoomaa Saa’udii fulla’insaan misooma Itiyoophiyaa deeggaruuf qophii ta’uu mirkaneessaniiru.

Ebla 16/2017 (TOI)-Waarshaan simmintoo Lammii baatiiwwan Ja’an darbanitti Simintoo kuntaala Miliyoona 12 ol gabaaf dhiheessuu beeksise. Ogeessonni Miidiyaa, Artistootaa fi Namoonni Bebbekamoon Naannoo Amaaraa waarshaan simintoo Lammii Aanaa Insaarroo naannawa magaala Lamiitti ijaarame daawwachaa jiru. Waarshaan Simmintoo lammii lammiilee kuma tokko ol ta’aniif carraa hojii uumuun kan ibsame yoo ta’u, babal’achuun Magaalaa Lammiis sababa guddaa misoomichaa ta’uun ibsameera. Waarshichi baatiiwwan Jahan darbanitti Simintoo Kuntaala Miiliyoona 12 ol ta’u omishee gabaaf dhiheessuun isaa ibsameera. Kanaanis gabaa tasgabbeessuu irra darbee gama konistiraakshiniitiin dadammaqinsa qabatamaa uumuunsaa hubatameera. Muummichi Ministiraa Dr. Abiyy Ahmad Waarshaan Simmintoo Lammii Fulbaana 18/2017 Eebbisanii tajaajila eegalsiisuun isaanii ni yaadatama. Waarshichi Itiyoophiyaatti Isti Afriika holsingii fi chaayinatti westi Internaashinaal holding waliin shaarikaan kan ijaarane yoota’u guyyaatti Simintoo kuntaala kuma 150 omisha.

Ebla 16/2017 (TOI)-Sirni Qonnaan bultoonni oomisha isaanii qabsiisuun tajaajila liqii argata eegalamuu Ministeerri Daldalaa fi walitti hidhata riijinii beeksise. Ministeerichi Gamtaa Warraaqsa Magariisaa Afrikaa, Dhaabbata Faayinaansii Idil-addunyaa fi qooda fudhattoota biroo waliin ta’uun pirojaktii sirna tajaajila nagahee mana kuusaa ammayyaa cimsuuf hojii eegalsiisuu isaa beeksiseera. De’etaan ministiraa daldalaa fi walitti hidhata riijinii Yaasmiin Wahabrabii akka jedhanitti, projaktichi sirna gabaa ammayyaa oomisha qonnaa kan fooyyessu ta’uu ibsaniiru. Sirni kun qisaasama oomisha qonnaa kan ittisu, qulqullina akka mirkaneessu, oomishaa fi oomishtummaa kan dabalu ta’uus ibsaniiru. Daldala al-ergii mijeessuun, oomishaalee damee industiriitiif galtee ta’uu danda’an dhiyeessuun gahumsaa fi dandeettii qonnaan bultootaa fi qooda fudhattoota biroo dandeettii qonna irratti qaban ni guddisa jedhaniiru. Sirni tajaajila nagahee mana kuusaa qonnaan bultoonni oomisha isaanii qabsiisuun tajaajila liqii akka argatan kan taasisu ta’uu ibsuun, tajaajilli kun qonnaan bultoonni oomisha isaanii gatii fooyya’aa ta’een gabaaf akka dhiyeessan kan taasisu ta’uu ibsaniiru. Pirojektichi waggaa lamaaf kan turu ta’uu odeeffannoon Ministeera Daldalaa fi walitti hidhata riijinii irraa argame ni mul’isa.

Ebla 16/2017 (TOI)- Foormiin Aveeshinii Itiyoophiyaa Magaala Finfinnee Hoteela Iskaaylaayitiitti gaggeeffamaa jira. Foramichi “akka addunyaatti aveesiniin guddatu, Afrikaa addunyaa walitti fida” Mata duree jedhuun gaggeeffamaa jira. Ministirri Geejibaa fi loojistiksii Dr. Alamuu Simee, Ministirri Tuurizimii Salaamaawwit Kaasaa, Daarekteerri Olaanaa Sivil Aveeshinii Itiyoophiyaa Geetaachoo Mangistee, hojiigaggeessaa olaanaa daandii qilleensa Itiyoophiyaa Masfin Xaasoo fi qooda fudhattoonni biroon foramicharratti argamaniiru. Fooramii guyyaa lamaaf turuun kanarratti daandiiwwan qilleensaa, eerpoortii fi dhiyessitoota industirii, fedhiiwwan adda addaa kan hammatu ajandaan dhihaatee mariin irrati gaggeeffama. Fooramichi gama Aveeshiniitiin walitti makamuu Ardii Afriikaaf Loojistikii Kaargoo fi bu’uuraalee misoomaa daandii qilleensaa Itiyoophiyaa ammayyeessuuf shoora guddaa akka bahatu eerameera.

Ebla 16/2017)- Walgahiin Mana Maree Tiraanisfoormeeshinii Qonnaa Naannoo Oromiyaa Marsaa 3ffaan Finfinnee Waajjira Pirezidaantii Oromiyaatti gaggeeffamaa jira. Pireezidaantiin Mootummaa Naannoo Oromiyaa fi Walitti Qabaan Mana Marichaa Obbo Shimallis Abdiisaa, Ministeerrii qonnaa Dr. Girmaa Amantee, sadarkaa itti aanaa pirezidaantii mootummaa naannoo Oromiyaatti qindeessa kilaastera misooma baadiyaa obbo Addisu Araggaa dabaltee qaamoleen qooda fudhatoonni biroon Walgahiin kana irratti hirmaacha jiru. Sadarkaa itti aanaa pirezidaantii mootummaa naannoo Oromiyaatti qindeessa kilaastera misooma baadiyaa obbo Addisu Araggaa haasaa sirna banisa walgahicharratti taasisaniin; Jalqaba kaayyoon manni marichaa hundaa'ee haalli qabatama yeroo ammaa qonni ittiin geggeeffamu duubatti hafaa waan ta'eef oomishaa fi oomishitummaa dachaan dabaluuf haala jiru keessaa baasuun qonna ceesisuun murteessa ta'uu yaadameetu jedhaniiru. Manni maree kun damee qonnaa ammayyeesuuf dhimmoota gargaara irratti hojii gorsaa, qindeesuu, rakkoowwan jiran adda baasuun furmaata akka argatan taasisuu hojjecha jiraachuu obbo Addisuu Araggaa himaniiru. Haaluma kanaan hojiiwwan waggoota 4'n darban hojjetameen galmoota misooma baadiyyaa milkeesu keessatti gahee olaanaa bahachaa jiraachuu eeraniiru. Hojii kanaan wabii nyaata mirkaneesuun eeggatummaa jalaa bahuuf hojii gama ce'umsa qonnaan hojjetameen oomishaalee kanaan dura alaa galan kanneen akka qamadii gabaa alaatti erguun jalqabamuu himaniiru. Oomishaalee biyya alaa galan kan biyya keeessaan bakka buusuu, oomishaalee gabaa alaaf dhihaataan dachaan dabaluu irrattis hojii hojjetameen milkaa'inni olaanaan galmaa'uu ibsaniiru. Hojii qonna ammayyeesurrattis hojjetameenis ce'umsi qonna Oromiyaa jijjirama guddaa fidaa jiraachuu himaniiru. Kanaanis Oromiyaatti lafti tiraakteraan qodamu kan kanaan duraa caalaa dachaan dabaluu himaniiru. Hojiin qonnaa ammayyaa'aa deemuun isaa immoo hirmaannaan dargaggoonni hojii qonnaarratti qaban akka dabalu taasisuu ibsaiiru. Walgahii mana maree tiraansfoormeeshinii qonna Oromiyaa kanaanis milkaa'inoota hanga ammaa argaman cimsuun haala danda'amuu fi galmoota hafan milkeesuuf hojii hojjetamuu qaburratti bal'inaan ni mari'atama jedhaniiru.

Ebla 16/2017 (TOI)- Gaggeessitoonnii fi ogeeyyonni damee dinagdee dhaabbilee mootummaa federaalaa hojiilee kooriidaraa fi misoomaa magaalichaa daawwachaa jiru. Daawwanicha ilaalchisee Itti Gaafatamtu Waajira Muummichaa fi Ministira dhimma kaabinee Aadde Alamtsahaay Phaawuloos ibsa taassisaniiru. Ibsa isaaniin daawwanichi hoggantoonnii fi ogeessonni damee diinagdee milkaa’inota galmaa’aa jiran qabatamaan akka ilaalaniif ta’uun ibsameera. Hojiiwwan misoomaa hojjetamaa jiran carraa dhaloota dhufuu gidduugaleeffatee yaadama cehumsaan hojiirra oolaa jiraachuu ibsaniiru. De’etaan Ministiraa Aadaa fi Ispoortii Nebiyyuu Baayyee Magalichatti hojiiwwan misoomaa koriideraa fi deebisanii misoomsuu dorgommii magalittii sadarkaa Aaddunyatti guddisuu irra darbee namoota jireenya gad aanaan jiraatan kan jijjiiredha jedhaniiru. Adeemsichaan Hambaawwan eeguun hojiiwwan misooma nama irratti xiyyeeffate hojjetamaa jiraachuu kaasaniiru. Magaala Finfinneetti itti gaafatamaa pirojektoota koriidariin misoomani obbo Kadir Adam magaalittiitti hojiiwwan misoomaa hojjetaman qinda’aa ta’uu ibsaniiru. Magaalichatti qarqara lagaa fi hojii deebisanii misoomsuu hirmaachisaa fi hunda galeessa ta’uun qulqulina isanii eeggatanii kan hojjetamanidha jedhaniiru.

Ebla 16/2017 (TOI)- Godina Harargee Lixaatti lafa qamadii jallisii boneen misoomerraa oomishni kuntaala miiliyoona 2 caalu walitti qabamuu waajjirri misooma qonnaa fi qabeenya uumamaa godinichaa beeksise. Waajjirichatti ogeessi misooma midhaanii Obbo Habiib Abdulkariim TOI’tti akka himanitti, oomishni kun aanaalee godinichaa 15 lafa heektaara kuma 65 fi 413 irraayyu. Oomishni kun kuntaala kuma 500niin kan barreengaddaa akka caalu himanii, midhaan lafa heektaara 414 irra jiru xumura baatii kanaa akka walitti qabamu eeraniiru. Qonnaan bultoonni aanaa 15 keessa jiran kuma 240 ol misooma Qamadii jallisii bonee baranaarratti hirmaachuusaanii yaadachiisaniiru. Qonnaan bultoonni oomisha karaa Yuuniyeeniisaanii gabaaf dhiheessanii fayyadamoo ta’uusaanii ibsaniiru. Qonnaan bulaan aanaa Bookee ganda Bookee Hroo Duddaa Kadir Yuusuuf akka jedhanitti, oyiruu heektaara walakkaa ol qamadii jallesii boneen misoomsanii irra caalaa walitti qabuun kuntaala 16 rgachuusaanii dubbataniiru. Jiraataan ganda kanaa kan biraan qonnaan bulaan Abdul Aziiz Mahaammad oomisha argatan gatii madaalawaatti gurguruun galtee qonnaaf oolan akka barbaadanitti bitachuuf akka isaan gargaare dubbataniiru. Fuulduras oomisha guddisuuf caalaa akka akka hojjetan ibsaniiru.

Ebla 15/2017 (TOI)- Dhimmi hulaa galaanaa Itiyoophiyaa ulaagaa kamiiniyyuu gaaffii bu’uuraa biyyaa fi ummataarratti kan hundaa’e ta’uun ibsame. Addunyaa irratti biyyoonni ulaa galaanaa hinqabne akka seera addunyaatti haala kennanii fudhachuun,fi filannoowwan birootiin fayyadamoo ulaa galaanaa ta’uun isaanii ni yaadatama. Biyyoonni Walii galtee gamlamee, riijinii fi Ardiidhaan gaggeessuun fayyadamaa ulaa galaanaa ta’uun faayyadamummaa guddina waliinii godhan baay’eedha. Fakkeenyaaf Afgaanistaan, paakistaan waliin, biyyi laatiin Ameerikaan, voliviya peeruu waliin walii galuun fayyadamoo ulaa galaanaa ta’uu danda’aniiru. Galaana Diimaa irratii fageenya dhi’ootti kan argamtu Itiyoophiyaan ulaa galaanaa kan qabdu turte, mudannoo seenaatiin dhihootti akka ilaaltu taateetti. Yeroo ammaa kana Mootummaan Itiyoophiyaan fayyadamoo ulaa galaanaa ta’uu qabdi ejjennoo jedhuun tattaaffii dippiloomaasii itti fufee jira. Tattaaffiin Dippiloomaasii Itiyoophiyaan gochaa jirtu fudhatama argachaaa jira. Dhimma kana irrati TOIn kan dubbise barsiisonni Yuunvarsiitii Jiinkaa dhimmi ulaa galaanaa Itiyoophiyaa madaallii kamiiniyyuu gaaffii bu’uuraa biyyaa fi uummataa ta’uu kaasaniiru. Barsiisaan dhimma Lammummaa fi naamusaa Yuunvarsiitichaa kan ta’an Misikkir Katamaa dhimmi balbala galaanaa waggoota dheeraaf osoo hin ka’iin turuun faayida biyyoolessaa dagateera jechuun kaasaniiru. Mootummaan jijiiramaa gaaffii hulaa galaanaa kaasuun, dantaa biyyaaf dhaabbachusaa kan agarsiisu ta’uu ibsaniiru. Tattaaffii motummaan ulaa galaanaa argachuuf taassisu hundi keenya deeggaruuf itti gaafatamummaa qabna jedhaniru. Gaaffii uulaa galaanaa Itiyoophiyaa, Hayyoonni, Namoonni bebbeekamoon, Miidiyaan Hawaasaa namoonni dhageettii qaban dhimma kana Ajandaa godhachuu qabu jedhaniiru. Haaluma walfakkatuun Yuunvarsiitichatti, Barsiisaan Seenaa fi hambaa Wandimmaageny Nagaash, Itiyoophiyaan mudannaa seenaatiin ulaa galaanaa dhabuunshee hunda keenya gaabbisiiseera jedhaniiru. Gaaffiin ulaa galaanaa gaaffii dhalootaa ta’uu kaasuun milkaa’ina deebiisaatiif hunduu gamtaan dhaabbachuun hojjechuu qabna jedhuun, Hayyoonni, namoonni beekkamoo fi diyaaspoorawwan gaffii keessan yeroo hundaa godhatanii hojjechuu qabu jedhaniiru.

Ebla 16/2017(TOI)-Buufanni Humna Elektirikii Itiyoophiyaa Gibee 3 ji’oota sagal darban keessatti humna ibsaa sa’aatii giigawatii kuma 5 fi 430 ol maddisiisuu beeksise. Hojii gaggeessaan oppireeshinii buufatichaa obbo Dajanee Guutaa akka ibsanitti, Buufatni Humna Bishaan Gibee 3 ji’oota sagal darban keessatti oomisha anniisaa karoorfame caalaa maddisiiseera. Buufatni humna elektiriikaa kun bara baajataa 2017 ji’oota sagal jalqabaa keessatti humna ibsaa sa’aatii giigaa waatii kuma 5 fi 436 tuqaa 5 maddisiisuu kan danda’e yoo ta’u, anniisaa sa’aatii kuma 4 fi 725 tuqaa 56 maddisiisuuf karoorfamee ture jedhan. Kunis sa’aatii giigaa waatii 710 tuqaa 94 ykn hanga karoorfame irraa dhibbeentaa 15 tuqaa 04, akkasumas sa’aatii giigaa waatii 189 tuqaa 65 ykn yeroo walfakkaataa bara darbee irraa dhibbeentaa 3 tuqaa 61 caala. Bu’aa kanaaf sababoonni hojiiwwan sakatta’iinsaa fi hordoffii yeroo yeroon oomisha humna ibsaa amanamaa ta’e mirkaneessu, hojiin hojii akkaataa maanuwaalii hojii hojii hooggansa dhaabbatichaatiin mirkanaa’een kan raawwatamu ta’uu isaa, akkasumas agarsiistonni addaan ciccituu fi rakkoolee (alaarmii fi badii) yeroo hubataman battalumatti akka dhabamsiifaman ta’uu ibsaniiru. Dhuma bara baajataa kanaatti humni ibsaa sa’aatii giigaa waatii kuma 6 fi 141 tuqaa 49 maddisiisuu fi hojiitti galchuuf karoorfamee, ji’oota sagal darban keessatti karoora waliigalaa keessaa dhibbeentaan 88 tuqaa 52 galma ga’uu isaa yaadachiisaniiru. Obbo Dajanee Guutaa itti dabaluun kun karoora bara bajataa keessatti milkeessuuf kaa’ame galmaan ga’uuf agarsiiftuu ta’uu ibsaniiru.

Ebla 16/2017(TOI)-Kantiibaan bulchiinsa magaalaa Finfinnee Adaanech Abeebee qaamolee misooma Kooridarii fi irra deebi’uun ijaaruu Kaazaanchis irratti gumaacha taasisan galateeffataniiru. Kantiibaa Adaanech ergaa fuula miidiyaa hawaasaa isaaniirratti dabarsaniin, Kaleessa galgala misooma kooriidaraa fi irra deebi’uun ijaaruu Kaazaanchiis irratti kontiraaktaroota, goesitoota, gaggeessitoota hojjettootaa fi dhaabbilee mul’ata keenya biyya badhaatuu uumuu halkan hirriba hin qabne hedduu, sagantaa hojii hirriba malee dabarsuun nu waliin hojjetan galateeffanneerra jedhaniiru. Kanneen keessaa dureeyyii Maashinootasaanii tolaan kan nuuf ergisan, kontiraaktarootaa fi gorsitoota pirojektii fudhatan yeroo fi qulqullinaan nuuf dabarsan, gaggeessitoota magaalaa keenyaa jalqabaa amma xumuraatti hojii kana qindeessan, dhaabbilee dhuunfaa, mootummaa fi federaalaa akkasumas abbootii qabeenya gamoo mul’ta keenya qooddachuun hojii biyya ijaaraa jirruuf gumaacha olaanaa taasisan hundaaf maqaa koo fi maqaa jiraattotaan galatoomaan jedha jechuun ibsaniiru.

Ebla 15/2017 (TOI)-Hojiin Biyya Ijaaruu, qulqulleessuu, fi miidhagsuu jabaatee kan itti fufu tahuu Muummichi Ministiraa Dr.Abiyyi Ahimad ibsan. Muummichi Ministiraa Dr.Abiyyi Ahimad, hojii misooma kooriidaraa Kaazanchis kaleessa eebisaniiru. Kaazanchis baatiiwwan muraasa dura bifa qabdu, haala amma jiru waliin yeroo madaalamu garaagarummaa guddaan jiraachuu eeraniiru. Misooma kooriidaraa marsaa 2ffaan Kaazanchisiin dabalatee eegaluu ibsuun, baatiiwwan muraasa gidduutti bu’aawwan argaman kan nama boonsu ta’uu ibsaniiru. Namoonni kaazaanchis irraa ka’anis nannicha daawwachuu ibsuun, haala duraan ture waliin yeroo madalan jijiirama guddaa tahuu ibsaniiru. Biyyoota birootti Ammayyummaa fi jijjiiramni kan dhufan haala Kanaan ta’uu ibsuun, Magaalonni Ammayyooman magariisaa fi qulqulluu ta’uusaanii ibsaniiru. Jiraattonni magaalichaa haala baratame keessaa baanee gara miidhagduutti cehuuf tattaaffii obsa nama fixachiisu kan gaafatu ta’uu ibsuun, biyya keenya guddisuu fi dhaloonni dhufu abdii akka qabaataniis biyya badhaate ijaaruuf gatii kaffalame ta’uu hubachiisaniiru. Hojiin Biyya keenya ijaaruu, qulqulleessuun fi miidhagsuun; hawwii keenyaa fi waan jenne qabatamaa gochuun agrsiisuun cimee itti fufa jedhaniiru. Kanafis, hoggansi sadarkaa sadarkaan jiru jabaatee, beekumsaa fi saffisaan hojjechuu akka qabu hubachiisaniiru. Yeroo ammaa tattaaffiin barbaachisaa ta’uu ibsuun, tattaaffiin sadarkaa tokko yeroo geenyu kan itti aanu xiinxaluun barbaachisaa ta’uu ibsaniru.

Ebla15/2017(TOI)–Naannoo Beeniishangul Gumuzitti Aanaa Baambaasiitti, pirojektiin humna solaarii birrii Miiliyoona 24 tuqaa 5iin ijaarame tajaajila kennuu eegaleera. Bulchaan Naannoo Beeniishaangul gumuz Obbo Ashadlii Hasan Tajaajilicha egalsiisaniiru. Bulchaan Naannichaa saganticha irratti akka ibsanitti, Pirojektichi kan ijaarame deeggarsa mootummaa Jaappaaniin ta’uu ibsuun, kunis dhiheessi bishaan dhugaatii qulqulluu hawaasichaa guddisa jedhaniiru. Tajaajilli annisaa Soolaarii Magaala Baambisii fi hawaasa naannooshee fayyadamaa akka taassisu dubbataniiru. Ijaarsa pirojektichaaf birriin miliyeena 24 tuqaa 5 basii akka ta’es ibsameera. Saganticha irratti kan argaman Itiyoophiyaatti Ambaasaddarri Jaappaan Shebataa Heronerii gamasaanii, humna Annisaa naannicha jiru, caalaatti babal’isuun kaampaanota gurguddoo Jaappan gara naannichaa akka seenaan ibsaniiru. Dabalataanis, Gamoon Bulchiinsa Baambaasii birrii miliyoona 22n Ijaarsise eebbifame tajaajilaaf banaa ta’eera.

Ebla 15/2017 (TOI)-Abbaan Taayitaa Bunaa fi Shaayii Itiyoophiyaa qulqullina bunaa fooyyessuu fi bu’aa bunarraa argamu hojjetamaa akka jiru beeksise. Waltajjiin qonnaan bulaarratti xiyyeeffate kan buna ispeeshaaliitii qulqulluu qopheessuuf gargaaru irratti hubannoo uumu magaalaa Jimmaatti gaggeeffamaa jira. Akka itti aanaan daarektara abbaa taayitichaa obbo Taagaayi Nuuruu jedhanitti galii damee kanarraa argamu guddisuufi qulqullinaa fi sadarkaa bunaa fooyyessuun fayyadama oomishtoota bunaa mirkaneessuuf hojjetamaa jira. Qonnaan bultoota qulqullina bunaa irratti araarama hin qabne uumuuf sosochiin qulqullina bunaa gaggeeffamaa turuu eeraniiru. Fudhatama qulqullinaa fi dhandhama bunaa mirkaneessuuf hojiiwwan oomisha bunaa hunda keessatti hojjetamuu akka qaban ibsaniiru. Buna qulqullina qabu oomishuuf mala adda ta’e hojiirra oolchuu fi xiyyeeffannoo guddaa itti kennuun barbaachisaa ta’uu eeruun, qulqullinni gabaa keessatti gahee olaanaa akka qabu ibsaniiru. Akka Itti Aanaa Itti Gaafatamaa Waajjira Qonnaa godina Jimmaa obbo Awwall Kealiil jedhanitti, qulqullina oomisha bunaagodinichaa fooyyessuuf hojiin hedduun hojjetamaa jira. Bunni godinicha keessatti oomishamu qulqullina buna addaa irratti xiyyeeffachuun gabaa giddu galeessaa fi addunyaa irratti dorgomaa akka ta’uuf kallattii kaa’ameen hojiirra oolaa jiraachuu eeraniiru. Mariin qonnaan bultoota buna oomishan, daldaltootaa fi ogeeyyii, akkasumas ogeeyyii industirii miiccaa fi falfalu hirmaachise gaggeeffamuu ibsaniiru. Oomishtoonni fi ogeeyyiin naannoo Oromiyaa godina Jimmaa, Iluu Abaaboor fi Buunoo Beeddeellee, akkasumas naannoo Ummata Kibba Lixa Itiyoophiyaa godina Kafaa fi Beench Shakkoo irraa dhufan leenjicha irratti hirmaataniiru.

Ebla15/2017(TOI):-Nageenyi tasgabbaa’aan godina Wallagaa Lixaa keessatti uumame yeroo sassaabbii milkii misooma qonnaaf carraa gaarii uumeera jedhan qonnaan bultoonni naannawaa. Xaa’oon bara oomishaa 2017/18 godinicha keessatti gamanuma isaan qaqqabaa akka jiru Qonnaan bultoonni ibsaniiru. Hojiin xaa’oo qonnaan bultootaaf yeroon akka dhiyaatu haala qindoomina qabuun hojjetamaa jiraachuu Waajjirri Qonna godinichaa beeksiseera. Qonnaan bultoonni aanaalee godina Wallagga Lixaa adda addaa Yaada TOI’f kennaniin, nageenyi tasgabbaa’aan godinicha keessatti uumame misooma qonnaa milkeessuuf carraa gaarii uumeera. Naannawa sanatti nageenyi cimaa fi tasgabbaa’aan diriirsuun hojiiwwan misooma qonnaa yeroon akka raawwataman taasiseera jedhan. Godinichatti qonnaan bultuun aanaa Laaloo Assaabii Asteer Tarfaasaa , Xaaoon gamanumaa dhihaachaa waan jiruuf hojii qonnaaf mijataa ta’uu ibsaniiru. Sirni kaffaltii xaa’oo dijiitaalaa ta’uus eeruun, sirna saffisaa, gahumsaa fi iftoomina qabu uumeera jedhan. Qonnaan bulaan ganda Homaa jiraatu Lammeessaa Habtee akka jedhanitti, xaa’oon qonna gannaaf dhihaachaa jiru oomishaaf carraa gaarii ta’a jedhan. Nageenyii fi tasgabbii yeroo ammaa godinicha keessa jiru qonnaan bultoonni xiyyeeffannoo isaanii guutummaatti gara qonnaatti deebisuun ibsameera. Jiraataan aanaa Laaloo Assaabii ganda Kaalii Gammachuu Fiqruu xaa’oon qonna gannaaf isaan barbaachisu bitachuu ibsaniiru. Haalli nagaa naannoo sanaa tasgabbaa’aa waan ta’eef, hojii qonnaa hojjechuuf akka mijatu ibsaniiru. Godinichatti ogeessi fedhii sanyii filatamaa fi Xaa’oo walitti qabuu Aadde Baamlaak Andu’alam akka jedhanitti, xaa’oon kuntaala kuma 340 ol qonnaan bulaaf raabsamaa jira. Xaa’oon kuntaala kuma 95 ol waqtii sassaabbii godinaalee keessatti buufata raabsaa qaqqabee, hanga ammaatti xaa’oon kuntaala kuma 47 fi 749 ol qonnaan bultootaaf raabsamuu isaa eeraniiru. Bara oomishaa 2017/18 Godinichatti lafa heektaara kuma 416 fi 965 ol midhaan gosa adda addaatiin uwwisuun oomisha kuntaala miiliyoona 13 ol walitti qabuuf karoorfameera.

Ebla 15/2017 (TOI)- Godina Jimmaatti bunni toonin kuma 57 fi 480 gabaa giddugalaaf dhihaachuu waajjirri Daldalaa Godinichaa beeksise. Itti gaafatamaan waajjirichaa obbo Xaahir Abduu TOItiif akka ibsanitti, Godinichatti bara kana Buna toonii kuma 68 fi 170 gabaa giddugalaaf dhiheessuuf karoorfamee hojjetamaa jira jedhaniiru. Hanga ammaattis Bunni tooniin kuma 57 fi 480 gabaaf dhihaachuu ibsuun omisha bunaa dhihaate keessaa tooniin kuma 29 fi120 kan dhiqamee fi tooniin kuma 28 fi 360 immoo kan hin dhiqamne tahuu dubataniiru. Adeemsi Omisha bunaa gara giddugala gabaatti dhiheessuu itti fufee jira jedhaniiru. Hanga ammaatti gara gabaa giddugalessaatti kan dhihaate haala karooraan dhibbentaa 84 ol raawwatamuu kan ibsan obbo Xaahir, Baatiiwwan itti aananitti, karooricha galmaan gahuuf hojjetamaa jiraachuu ibsaniiru. Godinichatti bara kana buna qulqullina isaa eeggate kan dhiqamee fi kan hin dhiqamne qopheessuun gabaaf dhiheessuu ilaalchisee buufata buna asheeta kuma 368 fi 102 buna goge kan falfalu industiriiwwan babal’achuusaa obbo Xaahir beeksisaniiru.

Ebla 15/2017 (TOI)-Proojaktiin bishaan dhugaatii qulqulluu godina Benishaangul Gumuz Aanaa Kurmuk keessatti ijaarame gaaffii yeroo dheeraaf deebii nuuf kenne jedhan jiraattonni aanichaa. Aanichatti birrii miiliyoona 299 oliin kan ijaarame pirojektiin bishaan dhugaatii qulqulluu kun guyyaa kaleessaa bakka hoggantoonni olaanoo federaalaa fi naannoo argamanitti eebbifamee tajaajila eegaleera. Pirojektiin kun jiraattota gandoota aanichaa jaha fayyadamoo akka taasisus ibsameera. Jiraattonni aanichaa akka jedhanitti pirojektiin bishaanii kun gaaffii misoomaa yeroo dheeraaf qaban deebiseeraaf. Jiraattota aanichaa keessaa Obbo Abdulbaasix Hamed yeroo darbe bishaan argachuuf karaa dheeraa deemuun dirqama ta'uu himan. Amma baajata ol’aanaa mootummaa naannoo fi federaalaan asitti bishaan argachuu keenyatti baay’ee gammanneerra jedhan. Obbo Abdulbasix itti dabaluudhaan, mootummaan gaaffii hawaasaa yeroo gabaabaa keessatti deebii kennuudhaan kutannoo agarsiise dinqisiifataniiru. Jiraattuun aanichaa kan biraa Aadde Asuura Belaa kanaan dura bishaan lagaa fayyadamaa turuu isaanii fi mana isaaniitti dhihoo bishaan dhugaatii qulqulluu qabaachuun carraa guddaa ta'uu himan. Itti dabaluunis, pirojektiin bishaanii kun tajaajila yeroo dheeraa akka tajaajilu of eeggannoo barbaachisu gochuuf qophii ta’uu ibsaniiru. Obbo Areshiid Issaa pirojektiin bishaan dhugaatii qulqulluu kun yeroo, keessattuu darabee eeguun yeroo qisasamu ni qusata jedhan. Kanaaf mootummaa guddaa galateeffanna jedhan. Sirna eebbaa kanarratti kan argaman Bulchaan Godina Beenishaangul Gumuz obbo Ashadli Hassan hawaasni aanichaa miira abbummaatiin pirojekticha tiksuu qaba jedhaniiru. Pirojektichi bakka Ministirri Bishaanii fi Inarjii Dr. Injinar Habtaamuu Itafaa dabalatee qondaaltonni olaanoo ministeerichaa argamanitti eebbifameera.